SBC suliffeqarfimmik aallarnisaasut aallartilluarnissaannik ikiuisarpoq

20/02/2018

Aallarnisaasutut unammilligassanut aalajangersimasunut tunngassutilimmik suliat pillugit oqaloqatigiittarnerit isumassarsioqatigiinnerillu suliffeqarfimmik piorsaaniarnermi pingaaruteqarput. Aallarnisaaniarnermi suut sissuigassaanersut, aallarnisaaniartutullu qanoq periarfissaqarnersoq, SBC-mut ilaatigut apeqqutigineqakkajupput. 

Suliffeqarfiutitaarnissaq pilerigigukku, aallarnisaaniatullu sulilereersimasut siunnersuutigerusutaannik tusagaqarumallutit, Paju.gl-imik oqaloqateqarnerput atuassavat.

 

Qanoq ilillusi Paju.gl isumassarsiaraasiuk?

Jens-Christian: Suliffeqarfimmik aallarniinissara sivisuumik pilerigisimavara. 2016-illi qaangiutilernerani ikinngutiginerpaasaralu Nicolai isumassarsiaq Paju.gl piviusunngortissallugu aalajangerpugut.

 

Suliffeqarfiliassatut isumassarsiarsi qanoq ilillugu piviusunngortippisiuk?

Jens-Christian: Suliffeqarfissatut isumassarsiatta qanoq iliorluta piviusunngortinnissaa pillugu misissuingaatsiartariaqarsimavugut, ilanngullugulu Jesper Buch, Just Eat-ip pilersitsisua, allaqatigisarsimavara. Suliffeqarfiliassattalu pilersinnissaanut iliuuserisariaqakkatsinnut ersarissumik paasisinninnissatsinnut taanna iluaqutaasimaqaaq.

Nicolai: Qanoq ililluta allarnisaassalluta pilersaarusiornitsinni unnuppassuit aamma atorsimavagut. Sulissutigilivillugu suliamik piviusunngortitsiniarluta suleqatigisassatta attaviginnginnerini, isumassarsiap qanoq aallartikkiartuaarnissaa aallaqqaammut pinnguareqqaarallarparput. Tassani Brugsen, maanna suleqatigisarput, aamma attavigaarput.

SBC ikiorsiilluaqaaq, assersuutigalugu qiortartakkanik peqalernissatsinnut qinnuteqaammut (klippekortansøgning) tunisassiamillu ineriartortitsinermi aningaasaliinikkut. Periarfissatsinnik paasissutisseeqataapput. Aammalu SBC-p pikkorissartitsisarnerpassuisigut suliffeqarfitsinnut nukittorsaataasussanik sakkussaqarlualerpugut.  

 

Maannakkut ulluinnarni qanoq ingerlatsivisi?

Nicolai: Ullaralaannguakkulli iniminniisoqalereersarpoq, nalunaaqutaq qulingiluaniilli ammarnitsinniik unnukkut qulingiluanut matunissatta tungaanut ulapputtarpugut. Inniminniisunik tingooraanerit nioqqutissanillu apuussuinerit ulapputigisarpagut. Ingerlalluaqaagut.  

 

Suliassat ingerlannerini unammillernartunik nalaataqartarpisi?

Jens-Christian: Sullissinissamik isumaqatigiissutissat arlaqartut, suliffeqarfittalu aallarnisarneranut kinguarsaataasut suli naammassineqanngillat.

 

Aallarnisaasuulluni suna nuannernersaava?

Nicolai: Ukiup ataatsip matuma siorna isumassarsiaq eqqarsaatigiinnarparput, ullumikkullu piviusunngortissimavarput, sullitarpassuaqalersimallutalu, assut nuannerpoq! - Ikiingutiginerpaasaralu peqatigalugu pilersitatta iluatsittumik ingerlanera.

Jens-Christian: Ullut tamarmik assigiinnginnerat aamma nuannequtaavoq, ullut tamarmik pissanganartortaqarput, nutaartaqartuaannaramik. Suliffeqarfitsinnilu immitsinnut naalagarinerput aamma nuannequtaavoq. 

 

Aallarnisaanianut allanut siunnersuutissaqarpisi?

Jens-Christian: Qunugisaqaratik aallartiinnartassapput.

Nicolai: Aallartinnissamut sapiissuseqartariaqarpoq, nutaarluinnarmut appakaanneq qununartortaqarsinnaagami. Ikiortissarsiornissaq aamma tunuarsimaarfigineqartassanngilaq, siunnersuutinut tusaaniarluartariaqarpoq, isumassarsiamik ammalluni allanut ikiorsiisinnaasunut saqqummiussinnaasariaqarpoq. 

Jens-Christian:  Suliffeqarfmmik pilersitsiniarnitsinni inuppassuit siunnersortigisimavagut, siunnersuuterpassuarnik isornartorsiutinillu pitsaasunik tuniorarneqarsimavugut. Ilinniutigalugillu tingulluartarsimavagut.

Aallarnisaanissamut sapiissuseqarpit? Isumassarsiatit pillugit isummersoqatigiinnissamut pisariaqartitsiguit SBC ikiuunnissamut piareersimavoq!

Søg på siden