SBC nutaamik pisortassarsiorpoq

12/09/2017

Sermersooq Business Council tassaavoq Kommuneqarfik Sermersuumi Inuussutissarsiornermut Siunnersuisooqatigiit kommunemi inuussutissarsiornikkut aningaasarsiornikkullu ineriartortitsinermik aammalu kommunemi inuussutissarsiutit tapersersorlugit ineriartortitsinermik suliaqartut. Siulittaasoq Martin Sandy Shalmi peqatigalugu suliniutit tamakku Ulla Lynge-p august 2013-miit pisortaaffigalugit ingerlassimasani, pisortassap nutaap suliassanut ikaarsaartinneqarnissaanut peqataariarluni ukiup nutaap aallartinnerani qimattussanngorpai. 

”SBC-imi ukiut sisamat nuannersut peqataaffigereerlugit suliat allamut tunniunnissaat pissusissamisoorpoq. SBC-p ineriartorteqqinnissaata piaartumik aallartinnissaa pisortat paarlaanneranni piffissami matumani isumannaassallugu pingaruteqartoq Ulla Lynge oqarpoq.

“Ulla-p suliniutigisimasai naammagisimaarluarpagut, kommuneqarfimmi inuussutissarsiortuni SBC ingerlalluartutut kiisalu iligisassatut inissisimalerneranut peqataasimavoq. Suliniut Colourful Nuuk, aallarnisaasunut siunnersuisarneq minnerunngitsumillu inuussutissarsiutinik ineriartortitsinermik suliniutit Ulla-p pisortaanerata nalaani ineriartortinneqarsimapput. Siulersuisut Ulla siunissami ajunnginnerpaanik kissaappaa, aammalu suliassap pisortassamik nutaamik atorfinitsitsinissap naammassinissaa pissangangalugu suliassasoq” siulersuisuni siulittaasoq Martin Sandy Shalmi oqarpoq.

 

Pisortap nutaap 1. Januar 2018 atorfininnissaa naatsorsuutigineqarpoq.

Inuttassarsiuussineq

 

 

Søg på siden