Inuussutissarsiortut mittarfik takinerusoq pisariaqartippaat

19/06/2018

Kalaallit Nunaanni inuussutissarsiornermi ineriartortitsisoqassappat, Nuuk 2200 meterimik mittarfeqartariaqarpoq. Taamatut isumaqarneq SBC-ip inuussutissarsiornerup ineriartortinneqarneranik suliaqarneraneersuuvoq, tassani mittarfik nutaaq annerusorlu annertuunik siuariartortitsinissamut periarfissaqarfiulertussaalluni – pingaartumik takornariartitsisarnerup iluani.

”Suliniutit amerlanerusut, aningaasaqarnikkut siuariartortitsinissamut periarfissanik nutaanik aallartitsiviusussat atorluaaviusussallu ingerlaavartumik suliaraagut. misilittakkavut aamma inuussutissarsiortunik aamma ingerlatseqatigiiffinnik nunanit allaneersunik qanimut suleqateqarnitta takutippaa, Nuummi takisuumik mittarfeqalerneq inuiaqatigiinni aningaasarsiornissamut nutaarluinnarnik periarfissaqalersitsisussaasoq,” nassuiaavoq Rune Fridorff-Hansen, Sermersooq Business Council-imi pisortaq.

Inuussutissarsiornermut siunnersuisartuunerup saniatigut SBC-ip ornigassatut aaqqissuussineq Colourful Nuuk ingerlappaa. inuussutissarsiornermut siunnersuisooqatigiit qularinngilluinnarpaat Nuuk issittumi illoqarfiit pingaarnersaattut, suli nunatsinni illoqarfinnut allanut pitsaasumik tuniluuttussamik, siuariartortitsinermut ingerlatitsisuusinnaasoq.

 

Angalanerit ataqatigiissitat

Angalatitsisartuni aamma angalatitseqatigiiffinni oqariartuut ersarippoq – Nuummi annerusumik mittarfeqalernissaa kissaatigaat. Ukiut kingulliit marluk ingerlaneranni angalatitseqatigiiffiit nunanit allaneersut assigiinngitsut 60-init amerlanerusut, Kalaallit Nunaannut angalanernik amerlanerusunik tuniniaasinnaanissamut, Nuummi nunanit tamalaaneersunut mittarfik pillugu SBC apeqquteqarfigisarpaat. angalanerit aamma ornigassanik ataqatigiissitsinissamik siunertaqarfiusut. Stine Selmer Andersen, SBC-imi takornariartitsisarnermut inuussutissarsiornermi siunnersorti, nassuiaavoq:

 

”Angalatitsisartut taakkua nunarsuarmi aamma Kalaallit Nunaanni ornigassarpassuit tikeraartarpaat. Unneqqarissumik siunnersorpaatigut: Kalaallit Nunaata sinneranut Nuuk iserfissatut atorsiuk. Taakkuami isiginninnerat malillugu nunap immikkoortuisa assigiinngitsorujussuunerat Kalaallit Nunaata nukittuffigaa. Nuummi nunanit tamalaaneersunut mittarfittaarutta, Kalaallit Nunaat nutaamik ilusilimmik ammarneqassaaq, nuna tamakkerlugu iluaqutigineqartussamik - pissutigalugu takornariat amerlanerit sumiiffimmi ataasiinnaanngitsumi aningaasarsiortitsisussaammata.”

 

Sullitassat eqimattakkuutaat nutaat aamma nunanit tamalaanit aningaasaliinerit

Takornariat atuinerisa qaffariaateqarnerata saniatigut, timmisartunut anginerusunut mittarfiit nutaat aamma sullitanut eqimattakkuutaanut nutaanut, maannamut timmisartunit mikisunit Dash8-nit killilerneqartarsimasunut, ammaassisussaavoq.

 ”Timmisartut anginerusut ilaasut amerlanerusut ataatsikkut angalasinnaanerannut ammaassisussaapput. Angalanerit taamaattut maannakkut periarfissaqanngillat, pissutigalugu eqimattat ataatsimoorlutik timmisartumut ilaasinnaanngimmata. Angalanernut immikkuullarissunut taamaattunut ammaassisinnaagutta, aningaasaliisartut nunanit tamalaaneersut maannangaaq najukkani takornariartitsisarnermi suliniutinut aningaasaliinissamut piareersimareerput. Assersuutigalugu Norge-miut ingerlataat Hurtigruten annertuunik aningaasaliinissamut soqutiginnilluni tamanut oqariartuuteqartareerpoq.”

 Kisianni aningaasaliinissanut, mittarfiit nutaat sukkasuumik aallartinneqarnissaat, apeqqutaavoq.

”Takornarianik pilerilersitsiniarnermi nunarsuaq tamakkerlugu sakkortuumik unammilleqateqarpugut. Maannangaaq ungasissumut ornigassanik pilersaarusiornerminni ilanngutissagaatigut, suliffeqarfinnut aningaasaliinissamut piareersimasunut ersarissumik kalerrisaarutiginissaa, pisariaqarpoq. Mittarfiliassani nutaani taakkunani sukkasuumik aallartikkutta aatsaat taamaaliorsinnaavugut,” itisiliivoq Rune Fridorff-Hansen, Sermersooq Business Council-imi pisortaq.

 

 

Søg på siden