Inuttassarsiuussineq: Pisortaq

13/09/2017

Sermersooq Business Council (SBC) aqutsisutut misilittagagissaartumik nutaamik pisortassarsiorpoq piaartumik atorfinittussamik, kingusinnerpaamilli 1. januar 2018.

Pisortamik ammasuullunilu suleriallaqqissumik, inuussutissarsiornikkut attavigissaartumik, suliffeqarfimmik ineriartortitsillunilu Kommuneqarfik Sermersuumi inuussutissarsiornikkut suleqataalluarsinnaasumik ujaasivugut. Angalangaatsiartarnissaq naatsorsuutigineqassaaq.

Aammattaaq pingaartippavut

  • Pisortatut ilinniagaqarluarsimanissaa, minnerpaamillu ulluinnarni aqutsinermik misilittagaqarnissaa
  • Angusaqarusuttuunissaa inunnillu attaveqarnermut oqaloqatiginnissinnaanermullu piginnaasaqarluarnissaa
  • Pisortatut eqeersimaartuunissaa, sulisullu akuutillugit ingerlatseriaaseqarluni
  • Attaveqaatissanik pissarsiniallaqqissuunissaa, attaveqaataalersunillu isumaginnilluarsinnaalluni
  • Isumaqatiginninniarnernik sungiusimasaqarnissaa, politikkikkullu aqutani sulinermik misilittagaqarluni
  • Tulluartumik qaffasissumik ilinniagaqarsimaneq, soorlu: cand.merc., cand.oecon., cand. scient. pol. assigisaannilluunniit
  • Arlariinnik oqaaseqartuunissaa, soorlu: kalaallisut, danskisut aamma tuluttut

Uagut neqeroorutigisinnaavagut

  • Unammilligassat pissanganartut, inuussutissarsiornikkut ineriartortitsineq kommunimi siumukarfiusumi
  • SBC’p ineriartornerata siulersuisut eqeersimaartut peqatigalugit pilersaarusiorlugulu timitalersornissaa
  • Suleqatitsialaat qiimasut suliffimmi nuannersumi
  • Siulersuisut eqeersimaartut akoorusuttullu

Atorfinitsitsinermi atugassarititat

Akissarsiat atorfeqarnermullu atasumik atugassat piukkunnassusermut naleqquttut.

Atorfimmut atasumik inissaqartitsisoqanngilaq, nutsernermulli atasumik angalaneq pequtillu nassiussorneri tjenestemandinut maleruagassat malillugit pissapput.

Paasisaqaqqikkusuppit?

Atorfik pillugu paasisaqarnerujumaguit, SBC-milu periarfissatit ilisimanerulerusullugit taava Martin S. Shalmi attavigisinnaavat tlf: +299 555733 imaluunniit email: martin@paamiut.com. Qinnuteqarnissamut killigitinneqarpoq tallimanngorneq ulloq 6. oktober 2017.

Qinnuteqaat soraarummeernermullu uppernarsaatit pisariallit oqaaseqaatillu uunga nassiunneqassapput: Tina Schmidt, email: tina@tlsressourcer.gl 

Søg på siden