Kalaallit Nunaat aatsitassarsiornerup iluani atorneqanngitsunik annertuunik periarfissaqarpoq, nunalu pinngortitap tunniussinnaasaanik pisuussutinik ulikkaarpoq, imaani aammalumi qaqqani. Najukkani inuussutissarsiornikkut piginnaasat ineriartorteqqinneqarnissaat SBC’p ilungersuutigai, taamaaliornikkut aatsitassarsiornerup iluani ineriartornermut malinnaajuarnissaq qulakkeerumallugu.

 

Aatsitassarsiornikkut suleqatigiikkaat

Aatsitassarsiornikkut suleqatigiikkaat suleqatigiiffianni Arctic Cluster of Raw Material-imi peqataanermigut  kalaallit nunallu allat suliffeqarfiinik SBC atassusiivoq, ilisimasanik nutaanik aviffigeqatigiittarneq aqqutissiuullugu. Nunat tamalaat akornanni aatsitassarsiornikkut niuffaffiit annerpaat ilaannut, soorlu Prospectors & Developers Association of Canada (PDAC), SBC peqataaniarluni ilisimasanik katersuivoq. Annertunerusumik paasisaqarsinnaavutit ukunani www.ACRM.dk aamma www.pdac.ca.

 

Train the Trainer

Periuseq Train the Trainer aqqutigalugu SBC najukkani attuumassutilinnut suliffeqarfinnullu paasissutissanik ilisimasanillu siammarterisarpoq. Suliffeqarfinnut aatsitassarsiornermut tunngasunik suliaqarnermi peqataarusuttunut SBC siunnersuisinnaavoq, assersuutigalugu isumannaallisaanikkut malittarisassanik assigisaannillu atuutilersitsinissami. 

 

Annikitsumik aatsitassarsiorneq

Annikitsumik aatsitassarsiorsinnaaneq aqqutigalugu Kalaallit Nunaanni najugaqavissut aatsitassarsiornissamut akuersissummik pisinnaapput. Akuersissutip taamaattup periarfissaqalersippaa sumiiffinni aalajangersimasumi ujaqqanik pinnersaasiassanik aamma saffiugassanik katersinissaq, piiaaneq aamma tuniniaasinnaaneq. Ukiumoortumik isertitat 100.000-nit amerlanerunngippata annikitsumik misissuillunilu piiaanissamik akuersissut atuutissaaq. Annertunerusumik paasisaqarit uani www.sullissivik.gl

 

Qeqertarsuatsiaani rubinisiorfik

True North Gems Greenland Qeqertarsuatsiaat eqqaanni rubinisiorfimmik 2015-imi aallartitsivoq. Tassunga atatillugu Qeqertarsuatsiaani ujaqqanik silisiviup nutaamik aaqqissuuteqqinneqarnerani SBC ikiuuppoq. Sannavik iluarsaanneqarpoq, rubininut ujaqqanullu pinnersaasiassanut allanut nutaanik silisivilerneqarluni. True North Gemsi silisivimmi pikkorissartitsinernik ingerlatsissaaq, taamaalillutit pitsaasumik silisinissamik ilinniartinneqarsinnaassallutit.